مقالات رأي

الإنقــــــــــــــــــــــــــــــــلاب الفــــــــــــــــاشل

الإنقــــــــــــــــــــــــــــــــلاب الفــــــــــــــــاشل
خلينا من ميدل ايست وهرست والتسريب ووو
علاش شنو الي جاء في الوثيقة وما قالوشوا؟
موش رفض التوقيع على أي وثيقة قادمة من البرلمان في محاولة لحصرو وتجميدو
علاش موش وصل اليوم الى مرحلة موش معترف فيها بالبرلمان، يستقبل في حزامو وما يستقبلش رجال الدولة باش يتباحثوا في شؤون البلاد
موش رفض التعيين الحكومي باش يبلوكي الحكومة ، وكي سكتو عليه وتصرفوا قال البلاد لا يمكن تمشي بقائمين باعمال
موش قال المحكمة الدستورية فات وقتها ورجع يستشهد بدستور بورقيبة قبل 65 سنة
موش جاب رئيس حملتو الانتخابية في سوسة وحطوا في وزارة الداخلية
موش عين الوزراء الي حاجتو بيهم في مواقع حساسة
موش بقى ايامات ماشي جاي على الثكنات حتى بعثولوا قالولو خفف رجلك شوي
موش قال الوضع هذا لا يمكن يستمر ويلزمنا نتعدوا لشرعية جديدة
موش مرجنا بقيادة كل القوات الحاملة للسلاح وحاول باش الداخلية تتمرد على وزيرها ورئيس الحكومة في وقت واحد
موش قام باكبر جريمة في حق الوطن الي ما قامش بيها اكبر الرؤساء الخونة في التاريخ!
موش الرؤساء يسافروا للبلدان باش يجيبوا استثمارات ويجذروا علاقات ويجيبوا مساعدات.. وهو يمشي للدول باش يقطع الطريق على حكومة تونس، عملها مع فرنسا وايطاليا وقطر وليبيا ما نتحدثوش على الامارات ومصر الي تابعين المعسكر لمتحالف معاه
علاش ما هددش عشرات المرات وقال تو يجي وقتهم وصواريخ وسنتدخل في الوقت المناسب…
علاش ما مشاش لمصر بقى ثلاث ايام، جابش معاه قفلة والا وكعبة حلوة لتونسن؟ ماو قضى لمرتو وذريه من خان الخليل وروح حط القضية في الدار وتعدى ديراكت لجامع الزيتونة يتوعد في الاسلاميين..
علاش مقالش على سفاح مصر أخي واغدق عليه عبارات الشكر والثناء ووصف رئيس البرلمان ورئيس الحكومة متاع تونس بالمنافقين
علاش موش بطل من التنسيق مع قيادات البلاد واصبح ينسق مع المغزاوي متعاع العسكر والعسكرة
علاش ما قالش انتهى عهد الاحزاب وجاب فكرة القذافي ملي انتخبوه وهو يجري باش يكرسها
علاش حزامو ما قالش يلزم الجيش يهبط ويسجن قيادات الاحزاب ويحط البقية في الاقامات الجبرية
علاش موش جاب سامية لأعلى مجلس سيادي في البلاد من غير ماشاور، وحطها عينيه ولسانو في البرلمان.
علاش موش سامية متاعو هي الي قالت:
*قيس سعيد عندو الجيش وعندو القضاء العسكري وعندو حالة الطوارئ، وحالة الطوارئ تخلي الجيش يحمي البلاد
*بمقدور الجيش القيام بإيقافات
*المؤسسة العسكرية فيها خويا وخوك وفيها عيلتنا وفيها توانسة
*تو كيف المدنيين يخرجوا يتناحروا ويتقاتلو وما عدش آمن حتى على دارك وعلى ولادك، تو وقتها تقولوا وينك يا جيش، وراكم جيش تونسي نحن محتاجينكم.
*انا نحب الجيش يهبط…
علاش شكون ما يعرفش الي قيس عندو مدة يفتش على انقلاب ما قدرش يوصل ليه
وما عندوش شجاعة الصعاليك باش يغامر عليه
وعندو ضياع ما عندوش ناس تعرف تخطط ليه
علاش هوما مخبين فكرة الانقلاب والا حاشمين بيها في بالك
هام يروجوا ليها من فوق المنابر
ثم ناس مزالت موش عارفة الجرائم الي ارتكبها السيد هذا وجماعتو
يلزمنا نعرفوا الي ثم مئات الانقلابات في العالم إذا موش آلاف
أما ما ثم حتى رئيس في العالم يتصل بالدول يقلهم ما تتعاونوش مع بلادي!!! آخي اما اخطر هذه والا انقلاب الفاشلة؟
راهي الانقلاب جريمة دكتاتورية
والتآمر على البلاد جريمة خيانة
السيد ما يعترفش بالدولة ما يعترفش بالدستور ما يعترفش بالبرلمان ما يعترفش برجال الدولة ما يعترفش بالاحزاب ما يعترفش بعشرية ما بعد الثورة ما يعترفش بالاستعمار ما يعترفش بثورات عربية ما يعترفش بتجريم التطبيع، ما يعترفش بسلطة رئيس الحكومة ما يعترفش بتحييد المؤسسة العسكرية… وانت حاير في خبر على ترتيبات انقلابية نشراتو ميدل إيست!!! تي نشرنا مئات منو وهو بيدو عمل عمايل اقوى مليون مرة من خبر ميدل وهرست غير أنتم تحبوا البرّاني… لا سمعتونا نحن عنا اشهر ونحن نبرحوا راهو يحنجج على انقلاب، لا سمعتو سعيدو بيدو في كل خطاب في افطار في كلمة في استقبال في تابين في صلاة في جامع في ثكنة في وزارة في الخلاء.. الانقلابات تتراقص من فمو.. تي مَشيت السيسي برك وقعدانو 3 ايام في دار الثورة المضادة وكان جاء تحت ثورة حازمة، ما يبقاش فيها نهار ترمي عليه الطلاق بالثلاثة مازال في المطار.

نصرالدين السويلمي

اظهر المزيد

Aymen Oueslati

محمد أيمن وسلاتي من مواليد 1982 مدون في موقع ميديا بلوس تونس

مقالات ذات صلة

اترك رد

زر الذهاب إلى الأعلى
error: Content is protected !!