مقالات رأي

شوقي الطبيب ماهوش وزراء النهضة…

شوقي الطبيب ماهوش وزراء النهضة..

الفخفاخ وقيس سعيّد في بالهم الناس الكل قعلول ومعروف و المكي و زيتون و شورى و السليتي!
دوب ما اقالهم الفخفاخ وسعيّد، لموا أغراضهم وحاسبوا وسلموا ما بعهدتهم ونظموا حفل استقبال على شرف الوزراء بالنيابة وانسحبوا في هدوء.
ياخي حبوا يعملوها مع شوقي الطبيب لا وزير ولا شيء رئيس هيئة منتهية عهدته ويواصل بأشكال عرفية، هاو نبت ليهم ثم وتسبب ليهم في مشكلة وهاو كركر معاه اغلب المنظمات ولينا في صراع بين حكومة مقالة ومنظمة منتهية الصلاحية ورئيس جاء يستعمل في الغورة شوي وحل وحلة المنجل في القلة.
هاهم الجماعة التحقوا بالمعركة واعلنوا “تضامنهم التامّ وغير المشروط مع العميد شوقي الطبيب، رئيس الهيئة الوطنيّة لمكافحة الفساد، وتثمينهم لما تبذله الهيئة من مجهودات لمقاومة الفساد وإرساء ثقافة النزاهة والحوكمة.
الإمضاءات
توفيق بودربالة، رئيس الهيئة العليا لحقوق الإنسان والحرّيات الأساسيّة
شوقي قدّاس، رئيس الهيئة الوطنيّة لحماية المعطيات الشخصيّة
نبيل بفّون، رئيس الهيئة العليا المستقلة للانتخابات
النوري اللّجمي، رئيس الهيئة العليا للاتصال السّمعي والبصري
فتحي الجرّاي، رئيس الهيئة الوطنيّة للوقاية من التعذيب
روضة العبيدي، رئيسة الهيئة الوطنيّة لمكافحة الاتّجار بالأشخاص
عدنان الأسود، رئيس هيئة النفاذ إلى المعلومة بالنّيابة.”

وعلاش 6 وزراء ما يقدروش يتحصنوا بوزاراتهم ويرفضوا الإقالة من حكومة مقالة؟!
لا ينجموا بسهولة.. اما ناس تشبعت بمفهوم الدولة، ويعرفوا الانتقال الديمقراطي رحلة طويلة ما تجيش بالغورة والتلهميڨ وإنما تجي بالصبر وطول النفس واحترام الدولة والمحاذرة عليها من العبث، يعرفوا الي الدولة في مراحل الانتقال الديمقراطي تكون حسّاسة بشكل كبير، واكثر حاجة تربكها هي التغول و الاستعصاء والشجار في اروقتها، يعرفوا زادة الي الدولة بنت حلال تحب شكون يدق الباب ويزوز برجليه اليمين، ويسمي باسم الله، موش الي يسوطي على السور ويطيح فوق الخوخة يكسرها ويخلع الشباك متاع الدوش ويدخل منو، ويجي سكران ورائحة الدخان تضرب تصرع، ويوقف قدام الدولة ويقلها جيت نخطب فيك على سنة الله ورسوله!!! سنة الله ورسوله راك تدخل من الباب وتجيب في يديك باقة متاع زهور، ماكش تسوطي على السور وجايب معاك كُلاّب وموس ناب حلّوف!!!!!!!!
فرق كبير بين شكون مستعد باش يتنازل بلا حدود لصالح الدولة
وبين شكون مستعد ينازل بلا هوادة من اجل احتلال بعض اركان الدولة.

نصرالدين السويلمي

اظهر المزيد

Aymen Oueslati

محمد أيمن وسلاتي من مواليد 1982 مدون في موقع ميديا بلوس تونس

مقالات ذات صلة

اترك رد

زر الذهاب إلى الأعلى
error: Content is protected !!